小一入學回顧
自問唔係「怪獸家長」（但通常100個入面都唔會有一個會自認係😬）
好喇，入正題，就係上年考完一輪小學，覺得知多d每間學校嘅特色，對父母對小朋友都係好事，所以喺度想分享下我同我身邊朋友嘅d故事！
<國際基督教優質音樂中學暨小學>
位於鑽石山半山位置，喜歡音樂嘅家長必定會揀，事關中英數音係必修科，音樂科再細分四科、合唱、器樂、音樂欣賞同創作。另一個特色就係基督教背景濃厚，聽聞老師們全部都係基督徒，自然吸引不少教徒慕名而來。最後，由於呢間學係每年最早開始面試嘅直資學校，唔少人都會當攞經驗，計埋計埋，報名人數都應該過4000。
面試安排喺早上九點幾，整個校園都播放住好柔和嘅音樂，第一個感覺就係「好有藝術氣氛」！
去到等候室，人多到坐唔哂，都等左差不多20分鐘，囡囡鼻敏感發作，係咁打乞嚏流鼻涕，心情好差，老師叫名，小朋友出去搭膊頭排隊，佢個樣仲好似未訓醒咁，我已心知不妙。喺小朋友上課室面試同一時間，父母就要去另一邊見老師，老師主要問「點解揀我地呢間學校？」「平時同小朋友去邊？」等閒話家常，之後就開始傾到宗教問題，由於我係一名基督徒，當然好樂意回答，但丈夫係無神論者，一講起「有冇去教會？」「會唔會去嘗試接觸基督？」等話題，就好唔自然，好多問題都𠵱𠵱哦哦。整體交談約十五分鐘，之後就去一間播緊聖經卡通嘅房間等小朋友。
聽我咁講，就知呢次面試係～衰左啦！
總結經驗：
1）面試前一晚，要囡囡先食定藥，避免鼻敏感發作，影響心情及表現！
2）父母就算唔係教徒都冇所謂，只要表現淡定自然，表示對信教持開放態度，只要小朋友表現好，學校都會收！
3）以學校安排黎睇，估計父母及小朋友的面試同樣重要！父母面試前要做少少功課！
Search